Future Greenland, 2026-ataatsimeersuarneq
19-20. maj 2026, Katuaq, Nuuk
”The Future is Greenland – Issittumi ukiuni qulikkaani inuussutissarsiornermik ineriartortitsineq”
Nunatsinni Sulisitsisut/GE qulissaa inuussutissarsiornermut atatillugu ataatsimeersuartitsissaaq, Future Greenland-imik qulequtaqartinneqartumik. Kalaallit Nunaanni periarfissat amigaataanngisaannarput, ukkatarineqartullu uagut sapinngissutsitsinnut sammijuartarput. Nunaavugut nukittooq, issittup qeqqani ukiunilu kingullerni pissutsit sorlaliipput taasinnaasatsinnik ukiuni qullikkaani issittumi. Nunarsuarmi nunat pissaanilissuit avannamut isigipput. Isumannaallisaanissamut nunanullu allanut politikkernermi nunarpaalussuit ilaapput. Issittoq Kalaallillu Nunaat niuernermut tunngasutigut nunanullu allanut politikkernermi annertusiartuinnartumik soqutiginartinneqariartuinnartumik. Pisut ilaat uagut immineq ilutsinnit aallaaveqarput, amerlaqisulli aamma nunanit avatangiiserisatsinnit aallaveqarlutik.
FG26-ernermi Kalaallit Nunaata nunarsuarmi inissisimanera aammalu inuussutissarsiornerup ineriartortinnissaanut nukittuumik inissikkiartornissaa qitiutillugu alaatsinaanneqarpoq – uagut peqataatilluta peqataatinnataluuunniit ingerlasuni. Kalaallit Nunaannilu imatut oqariartortalernikuuvgut ”Inuussutissarsiorneq pillugu uagut peqataatinnata eqqartuisoqassanngilaq”.
Future Greenland-imi Kalaallit Nunaata ineriartornermi inissisimanera qitiutinniarparput. Nunamimi nammineerneruleriartuaarusuttumi nukittuumik namminersorlutik inuussutissarsiortut pisariaqartinneqarluinnarput. Aningaasaqarniarnermimi suliffeqarfiit aaliangiilluinnartumik inissisimapput inuiaqatigiillu atugarissaarnissaanut pisariaqarluinnartuullutittaaq. Inuiaqatigiimmi atugarissaarnissaat uagut naleqartitatsinni qitiulluinnarpoq. Inuussutissarsiornerlu niueqateqarnissami pinngitsoorneqarsinnaanngilaq. Nunarsuarmi politikkilerinerup iluani ukkatarineqarpoq niueqatigiinnermut politikki nunanut allanut isumannaallisaanermullu politikkilu qanoq imminnut ”nipilersoqatigiinnerat”. Nuummi FG26-lerutta tamanna oqallisigitissavarput.
Kalaallit Nunaata Issittullu soqutigineqaraluttuinnarnerat aammalu Kalaallit Nunaata ineriartornera naammineerusunnermullu ingerlajartornera, FG26-ertitsilerutta nunarsuarmi ”eqikkaakkaluttuinnartutut” digitalinngoraluttuinnartutullu iluseqaleriartuinnarneq nunatta inuussutissarsiornikkut ineriartornera pillugu sammisaqartitsinissatsinni tunngavittut aallaavigissavagut. Oqallisigissavagut Kalaallit Nunaata inuussutissarsiornermik ingerlatsisuisa periarfissaat ilanngullugillu oqallissutigalugit Kalaallit Nunaanni politikkimik suliaqartuusut qanimut suleqatigalugit piviusunngortitsiniarnermi suut timitalissallugit avaqqunneqarsinnaanngitsut.
Siunissamut aqqusinniornermi asfaltilersuinermi meterit siulliit manissarneqareerput -– The Future is Greenland – maannalu allarsarnialissaagut!